Gəncə Şəhər Mənzil-Kommunal Təsərrüfatı İstehsalat Birliyi şəhərin küçə, prospekt və parklarında əsaslı təmir və abadlıq işlərinin və işıqlandırma sistemlərinin əsaslı təmir işlərinin satın alınması haqqında 3 müqavilə bağlayıb.

GancaPost.info saytı dövlət satınalmalarının vahid internet portalına istinadən xəbər verir ki, Gəncə Şəhər Mənzil-Kommunal Təsərrüfatı İstehsalat Birliyi “Vedi Construction” MMC, “ELVI.M.M. SERVICES GROUP” MMC və “Göygöl Tikinti” MMC ilə ümumi dəyəri 3 milyon 131 min 433,19 manat olan müqavilə bağlayıb.

“ELVI.M.M. SERVICES GROUP” MMC ilə bağlanmış 1 milyon 623 min 552,89 manat məbləğində müqavilə şəhərin istirahət parklarında əsaslı təmir və abadlıq işlərinin satın alınmasını nəzərdə tutur. İşlər 31 mart 2024-cü ilə qədər yekunlaşdırılmalıdır.

“Vedi Construction” MMC ilə bağlanmış müqavilə Gəncə şəhərinin küçə və prospektlərində əsaslı təmir işlərinin satın alınmasını əhatə edir. Müqavilənin məbləği 897 min 240,78 manatdır. İşlər 31 dekabr 2024-cü ilə qədər başa çatdırılmalıdır.

“Göygöl Tikinti” MMC ilə bağlanmış 610 min 639,52 manat məbləğində müqavilədə Gəncə şəhər ərazisində işıqlandırma sistemlərinin əsaslı təmir işlərinin satın alınması nəzərdə tutulur. İşlər 31 dekabr 2023-cü il tarixinədək yekunlaşdırılmalıdır.*