Gəncə şəhəri və ətraf rayonlarda sahibsiz küçə itləri ilə bağlı problem hələ də qalmaqdadır.
Gəncədə gün ərzində insanların ən çox hərəkət etdiyi mərkəzi küçələrdə, parklarda, şəhərin qəsəbələrində itlərin sürü halında gəzdiklərini müşahidə etmək olar.

Məsələnin ciddiliyi xəstəxanalara edilən müraciətlərin sayının çoxluğunda da görünür. Belə ki, son aylarda edilən müraciətlər ötən ilə nisbətən təxminən 10% çoxdur.

Məsələ ilə bağlı Gəncə şəhər Z.Məmmədov adına Xəstəxananın həkimi Mirqalib Seyidov "KəpəzTV"-yə bildirib ki, it dişləməsi ilə əlaqədar olaraq müraciət edənlərə Gəncə şəhər Təcili Yardım şöbəsində ilk yardım göstəririk. İlk gələn xəstəyə quduzluğa qarşı vaksin vurulur. Son 9 ay ərzində Gəncə şəhəri və ətraf rayonlardan bizə müraciət edənlərlə birlikdə 1112 nəfərdə it dişləmə olub. 55 nəfər isə bu ay ərzində müraciət edib.

Hazırda Gəncədə sahibsiz küçə itləri ilə bağlı yalnız bir sığınacaq fəaliyyət göstərir. Sahibsiz heyvanlar üçün bu kimi mərkəzlərin sayı artarsa, itləri qısırlaşdırmaq, xəstəliklərə qarşı peyvəndləmək daha asan olar. Bu, həm də sakinlərin təhlükəsizliyi baxımından vacibdir.