Dövlət Şəhərsalma və Arxitektura Komitəsi tabeliyində Ərazi Tikinti-Planlaşdırma Mərkəzi 2020-ci ilin payızında Ermənistan silahlı qüvvələrinin Azərbaycan Respublikası ərazisinə təcavüzü nəticəsində Gəncə şəhəri, Füzuli, Tərtər, Ağcabədi, Goranboy və Beyləqan rayonlarında dağıdılmış, qəzalı vəziyyətə düşmüş, təmir və bərpaya ehtiyacı olan fərdi yaşayış evləri və qeyri-yaşayış obyektlərinin tikintisi, təmiri və bərpası işlərinə 6,3 milyon manat yönəldəcək.

GancaPost.info saytı etender.gov.az portalına istinadən xəbər verir ki, “AZ Graft Construction” MMC və “Parlaq-N” MMC ilə müvafiq müqavilələr bağlanıb.

“AZ Graft Construction” MMC ilə bağlanmış 2 milyon manat məbləğində müqavilə Gəncə şəhəri, Füzuli və Tərtər rayonlarında fərdi yaşayış evləri və qeyri-yaşayış obyektlərinin tikintisi, təmiri və bərpasını nəzərdə tutur.

“Parlaq-N” MMC ilə bağlanmış 4,3 milyon manat məbləğində müqavilə Gəncə şəhəri, Ağcabədi, Goranboy və Beyləqan rayonlarında fərdi yaşayış evləri və qeyri-yaşayış obyektlərinin tikintisi, təmiri və bərpasını nəzərdə tutur.

Müqavilələr çərçivəsində işlərin yerinə yetirilmə müddəti 30 dekabr 2023-cü ilə qədərdir.*