Gəncə şəhəri və ətraf rayonlarda sahibsiz küçə itləri ilə bağlı problem yaşanır və getdikcə ciddi təhlükəyə çevrilir.
Gəncədə gün ərzində insanların ən çox hərəkət etdiyi mərkəzi küçələrdə itlərin sürü halında gəzdiklərini müşahidə etmək olar.

Son vaxtlar sahibsiz itlərin insanlara hücum faktları da artmağa başlayıb. Təkcə son iki ayda Gəncədə 302 nəfər Şəhər Təcili Yardım xəstəxanasına sahibsiz it dişləməsi ilə bağlı müraciət edib.

Ötən ay Cəlilabadda 11 yaşlı qızın it dişləməsindən ölməsi isə insanları daha çox narahat edib.

Şəhərin əsas probleminə çevrilən bu məsələnin həlli ilə bağlı isə demək olar ki, ciddi addım atılmır. Aidiyyatı qurumlar ancaq masa arxasında müzakirə etməklə kifayətlənir.

Gəncədə sahibsiz itlər sakinlər, xüsusən də azyaşlılar üçün ciddi təhlükə mənbəyinə çevrilib.
Çünki, bu cür itlər quduzluq və digər yoluxucu xəstəliklərin daşıyıcısı ola bilər. Küçədəki canlıları sevən, onların qayğısına qalanlar da az deyil. Ancaq bu itlərin quduz olma ehtimalı insanları onlardan çəkinməyə vadar edir.

Problemin qarşısını almaq üçün təcili sığınacaqların yaradılması vacibdir. Bunun üçün xarici ölkə təcrübəsindən yararlanmaq lazımdır.
Məsələni masa arxasında həll etməyə çalışan Gəncə Şəhər İcra Hakimiyyəti isə, yəqin ki, bu problemlə qarşılaşmadıqları üçün vəziyyəti hələ də anlamır.