Gəncədə dəmiryolu mütəxəssisləri hazırlanacaq.

Gələn il Gəncədə Fransanın "Alstom" şirkətinin tədris mərkəzinin açılması planlaşdırılır.

"Trend"in məlumatına görə, bunu şirkətin Azərbaycan, Gürcüstan, Özbəkistan və Türkmənistan üzrə icraçı direktoru Elşən Zeynalov "Alstom"un tədris mərkəzinin (dəmiryolu sahəsində mütəxəssislər hazırlayan mərkəz) tədbirində deyib.

Onun sözlərinə görə, dəmiryolu sahəsi bütün ölkələrin iqtisadiyyatlarının təkanverici qüvvəsidir.

"Dəmir yolu sahəsi uzun illər üzrə perspektivlərə malikdir və əminik ki, tələbələrimiz Azərbaycanın dəmir yollarının və bütünlükdə nəqliyyat sektorunun inkişafına böyük töhfə verəcək", - deyə E.Zeynalov əlavə edib.

Tədbirdə çıxış edən Fransanın Azərbaycandakı səfiri xanım Ann Buayon bildirib ki, "Alstom" tədris mərkəzi (dəmir yolu sahəsində mütəxəssislər hazırlayan mərkəz) Azərbaycan Texniki Universitetinin bazasında dəmiryolu işçilərinin hazırlanması prosesinə yeniliklər gətirir və ən son texnologiyaları tətbiq edir.

Səfir Fransanın Bakıda və Gəncədə də bir sıra dəmiryolu layihələrini maliyyələşdirəcəyini vurğulayıb.