Birləşmiş Ştatlar qlobal miqyasda demokratiyanı təşviq edən proqramlar üçün yeni maliyyə dəstəyi elan edib.

Bu barədə Vaşinqtonda keçirilən Demokratiya Sammitində bildirilib.

BMT-nin baş katibi Antonio Quterreş Vaşinqtonda keçirilən 2023-cü il Demokratiya Sammitində demokratiya, qanunun aliliyi və insan hüquqlarına hörmət kimi dəyərlərin bütün dünyada hücuma məruz qaldığı barədə xəbərdarlıq edib.

“Vətəndaş cəmiyyətləri divarlarla əhatə olur, konstitusiya hüquqları məhdudlaşdırılır və vətəndaş azadlıqları pozulur. İfadə azadlığı azalır,” deyə Antonio Quterreş bildirib.

Quterreş ölkələri etimadı bərpa etməyə və bərabərsizliklərlə mübarizə aparmağa çağırdığı vaxt ABŞ prezidenti Co Bayden demokratiyanı təşviq edən bir neçə proqrama dəstək verildiyini açıqlayıb.

“Biz növbəti iki il ərzində prezident təşəbbüsü üçün daha 690 milyon dollar yeni maliyyə vəsaiti əlavə etməyi planlaşdırırıq. Üç il ərzində mənim administrasiyam dünyada demokratiyanın inkişafı üçün bütün səylərimizə 9,5 milyard dollar ayırmaq üçün Konqreslə işləmək niyyətindədir,” deyə prezident Bayden bildirib.

Onun sözlərinə görə, demokratik idarəetməni inkişaf etdirən texnologiyaya xüsusi diqqət yetiriləcək.