İqtisadiyyat Nazirliyində Avropa Yenidənqurma və İnkişaf Bankının (EBRD), aidiyyəti dövlət qurumlarının və Gəncə şəhər İcra Hakimiyyəti nümayəndələrinin iştirakı ilə Gəncədə “Yaşıl Şəhər” layihəsi üzrə görüləcək işlər müzakirə edilib.

Görüşdə İqtisadiyyat nazirinin müavini Sahib Məmmədov EBRD ilə birgə həyata keçirilən layihələrin ölkəmizin “yaşıl” inkişaf hədəflərinə çatmasına töhfə verdiyini qeyd edib.

Qeyd edək ki, Azərbaycanda ilk olaraq, Gəncə şəhəri Avropa Yenidənqurma və İnkişaf Bankının "Yaşıl şəhərlər" proqramına qoşulub. Avropa Yenidənqurma və İnkişaf Bankının (AYİB) maliyyə dəstəyi ilə reallaşdırılan layihədə "Gəncə - Yaşıl Şəhər" fəaliyyət planında şəhərdə çirklənmiş ərazilərin təmizlənməsi, ağıllı texnologiyalardan istifadə etməklə enerji səmərəliliyini artırmaq (küçə işıqlandırılması) və ekoloji probemləri həll etməklə sənaye potensialını inkişaf etdirmək imkanı əldə olunacaq. "Yaşıl Şəhər" yüksək keyfiyyətli və mükəmməl şəkildə əlaqələndirilmiş yaşıl ərazilərin salınması, şəhərin yeni ictimai nəqliyyat şəbəkəsinin, içməli su və çirkab su xəttləri infrastrukturunun yaradılması, həmçinin bərk məişət tullantılarının idarə edilməsi, şəhərdə tullantıların utilizasiyasını həyata keçirmək üçün poliqonun inşası nəzərdə tutulur.