"Qazla bağlı vahid tarifə keçilməsi daha yaxşı olardı"

Bunu Milli Məclisin keçirilən iclasında Nazirlər Kabinetinin 2022-ci ildəki fəaliyyətinə dair hesabatın müzakirəsi zamanı deputat Naqif Həmzəyev bildirib.

Deputat əhalinin qaz limitinin olmasından narahat olduğunu söyləyib: “Mart ayında limiti keçmiş vətəndaşlarımız çoxdur. Gələcəkdə bu məsələni diqqətdə saxlayaraq vahid tarifə keçilməsi daha yaxşı olardı”.

Naqif Həmzəyev qeyd edib ki, digər məsələ sağlam həyat tərzinin təbliğ edilməsi və kütləviliyin təmin edilməsi üçün məhəllələrdə idman meydançalarının quraşdırılması işinin sürətləndirilməsidir: “Bahalı mərmər və ya tikinti materialları əvəzinə sadə idman alətlərini bütün yaşayış məntəqələrinin məhəllələrində yerləşdirmək mümkündür. Həmçinin orta məktəblərin idman meydançaları özəlləşdirilərək başqa məqsədlər üçün istifadə olunur.

Digər tərəfdən isə, ölkədə şəhərlərarası avtomobil yolları yaxşı vəziyyətdədir. Ancaq eyni fikri daxili yollar haqqında səsləndirmək mümkün deyil. Şəhər və rayonların, qəsəbələrin daxili yolların keyfiyyətli çəkilməsinə nəzarət olunmalıdır. Xüsusilə, seçildiyim Gəncə şəhərində avtomobil idarə etmək müşkül məsələdir”.