Gəncə şəhərinin keçmiş icra başçısı Elmar Vəliyevə sui-qəsddə və digər cinayət əməllərində təqsirli bilinərək ömürlük azadlıqdan məhrum edilən Yunis Səfərov (onunla birlikdə mühakimə olunan 11 nəfər) Ali Məhkəməyə kassasiya şikayəti verib.

Şikayət Ali Məhkəmənin hakimi İlqar Qılıcovun icraatındadır. İyunun 1-də iş üzrə məhkəmə baxış iclası keçiriləcək. Bundan əvvəl 4 dəfə baxış iclası üçün vaxt müəyyən olunub. Lakin heç birində iclas baş tutmayıb.

Xatırladaq ki, 2018-ci il iyulun 3-də Gəncə şəhər İcra Hakimiyyətinin başçısı Elmar Vəliyevə (artıq həmin vəzifədə çalışmır) və onu mühafizə edən polis serjantı Qasım Aşbazova silahlı sui-qəsd olub, onlar xəsarət alıblar. Sui-qəsdi törətdiyi bildirilən Yunis Səfərov həbs edilib.

Sui-qəsd hadisəsindən bir həftə sonra - iyulun 10-da Gəncənin mərkəzi meydanında keçirilən aksiyada iki polis polkovniki qətlə yetirilib. Gəncə hadisələrindən sonra həbs olunan 70-dən artıq şəxsin əksəriyyəti 10 iyulda baş verənlərə görə kütləvi iğtişaşların təşkili, polis əməkdaşlarına qarşı zor tətbiq etmə və s. əməllərdə ittiham olunub. Onlara 6 ildən 18 ilə qədər həbs cəzası kəsilib. Sonradan bir çoxunun cəzası azaldılaraq 2-5 ilə salınıb, azadlığa buraxılanlar olub.

Yunis Səfərov isə ömürlük azadlıqdan məhrum edilib.

Cinayət işi üzrə Gəncənin sabiq icra başçısı Elmar Vəliyev və daha 5 nəfər (Qasım Aşbazov, Natiq Əhmədov və başqaları) zərərçəkən şəxs qismində tanınıb.