"Gəncə ölkənin yalnız ikinci böyük şəhəri deyil, həm də zəngin tarixi irsi, ənənələri, tarixi şəxsiyyətləri ilə məşhurdur"
Nizami yurdunun özünəməxsus futbol ənənələri də var. Həmçinin gəncəlilər komandalarına kənardan baş məşqçi gəlməsinə daim soyuq münasibət göstərib. Bura təkcə fanatlar yox, Gəncədən olan veteranlar da daxildir.
Bunu nəzərə alaraq yaxın keçmişdə "Kəpəz"i çalışdıran, Gəncədən olmayan mütəxəssis, hazırda “Səbail”i çalışdıran Şahin Diniyev "FutbolPlyus" qəzetinə bunları söylədi:

"Əvvəla onu deyim ki, Gəncə özünə görə ağırlığı olan bir şəhərdir. Buranın sakinləri ilə Bakının, Sumqayıtın əhalisini bir tutmaq olmaz. Əlbəttə, "Kəpəz"ə rəhbərlik etdiyim dövrdə mənə də təzyiqlər olub. İstər şəhərin veteran futbolçuları, istər məşqçilər, istərsə də azarkeşlər arasında məni gözü götürməyənlər var idi. Hətta olub ki, çempionatın ilk turunda uduzanda istefaya səsləyiblər. Amma bunu hamıya şamil etmək olmaz. Həmçinin, Gəncədə bu halın ifrat dərəcədə olduğunu da demək düzgün deyil. 50-nin 50-yə idi. Bir çox hallarda jurnalistlər də bundan öz məqsədləri üçün istifadə etməklə vur-çatlasın yaradırlar".