Avropa Parlamenti elektrikli avtomobillərə keçidi sürətləndirmək və iqlim dəyişikliyi ilə mübarizə aparmaq məqsədilə benzin və dizellə işləyən avtomobillərin satışını qadağan edən qanunu rəsmən təsdiqləyib. Qanun Avropa İttifaqında 2035-ci ildən etibarən tətbiq olunacaq.

Bu barədə "Reuters" məlumat yayıb.

Yeni tələblərə əsasən, 2025-ci ilə qədər istehsalçılar yeni avtomobillərdə karbon emissiyalarının 100% azaldılmasına nail olmalıdır. Bu, İttifaqın 27 ölkəsində benzin və dizellə işləyən avtomobillərin satışını qeyri-mümkün edir.

Qanun həmçinin 2030-cu ildən etibarən satılan yeni avtomobillər üçün 2021-ci ilə nisbətən karbon emissiyalarının 55% azaldılmasını nəzərdə tutur. Bu da mövcud 37,5%-lik hədəfdən xeyli yüksəkdir.

Bu qərardan sonra Avropada bir çox avtomobil istehsalçılarının elektrik avtomobillərinə sərmayə qoyacağı gözlənilir.