Türkiyədə baş verən güclü zəlzələdən sonra Azərbaycanın hansı zonalarının daha seysmik olması gündəmə gəlib.

Respublika Seysmoloji Xidmət Mərkəzinin baş direktoru Qurban Yetirmişli jurnalistlərə açıqlamasında deyib ki, ölkəmiz tam seysmik zonada yerləşir:

"Azərbaycan tam seysmik zonada yerləşir. Böyük seysmik qurşağın biri də buradan keçir və biz də tam seysmik zonada yerləşirik”.

"Burada Xəzər dənizi, Azərbaycanın şimalı - Quba-Xaçmaz, Şəki-Zaqatala-Balakən, qərb zonasından Gəncəbasar, Şamaxı-İsmayıllı zonası, Lənkəran. Hamısı 8-9 ballıq zəlzələ zonasıdır. Yəni, ölkəmiz tam seysmik zonadadır”, - deyə Qurban Yetirmişli əlavə edib.

Bundan öncə Qurban Yetirmişli mətbuata açıqlamasında qeyd etmişdir ki, FHN son 4-5 ildə tikilən yaşayış və qeyri-yaşayış binalarında təcili yoxlamalara başlamalıdır. 8 ballıq zəlzələ zonası ilə müqayisədə 9 ballıq ərazidə tikinti apararkən hesablanmış normativlərə görə, 40 faiz əlavə vəsait qoyulmalıdır.

Onun sözlərinə görə, xüsusi dəmir-beton kolonların, armaturların, N kəsiyinin ölçüləri nəzərə alınmalıdır: “Əgər 8 ballıq zonada bina 1 milyona başa gəlirsə, 9 ballıqda 1 milyon 400 min manata başa gələcək. Tikinti şirkətləri əlavə vəsait xərcləmək istəmirlər”.