Gəncənin 3-cü və 4-cü mikrorayon ərazisində yaşayan sakinlər bildirirlər ki, məhəllədaxili yollar baxımsız və bərbad vəziyyətə düşüb.

Onların sözlərinə görə, yağıntılı hava şəraiti vəziyyəti daha da acınacaqlı edir. Biraz yağış yağanda yol keçilməz günə düşür.

Məsələ ilə bağlı Gəncə Şəhər İcra Hakimiyyətindən bildirilib ki, hazırda şəhərdə "Açıq Kommunal İnfrastruktur Proqramı II" layihəsi icra olunur.

Qeyd edilib ki, küçələrin, qəsəbə və məhəllədaxili yolların asfaltlanması işləri şəhərin içməli su və çirkab su xətləri sisteminin yenidən qurulması məqsədi ilə həyata keçirilən sözügedən layihəyə paralel şəkildə aparılır:

"Açıq Kommunal İnfrastruktur Proqramı II" layihəsi çərçivəsində su-kanalizasiya xətlərinin çəkilişi və yenilənməsi tam yekunlaşan ərazilərdə mərhələli şəkildə asfalt işlərinin görülməsi həyata keçirilir. Bu proqram çərçivəsində mərhələli şəkildə şəhərin küçə və qəsəbələrində yollar təmir olunacaq".