AzETA (Azərbaycan Respublikası İngilis Dili Müəllimləri Birliyi) Gəncə Dünya Məktəbində birliyin Samux filialının rəhbəri Aidə Elyazova və Gəncə Dünya Məktəbinin kordinatoru Aslan Quliyevin təşkilatçılığı ilə özünün post-pandemiya regional konfransını keçirib.

Pandemiyadan sonra cari ildə Göygöl, Şəki və İsmayıllı filiallarının təşəbbüsü ilə genişmiqyaslı təlim xarakterli görüşlər olsa da, ilk regional konfrans 17 dekabrda keçirilib. Konfrans həm öyrədici, eyni zamanda mübadilə xarakterli olub.

Konfransda Bakı, Bərdə, Gəncə, Göygöl, İsmayıllı, Mingəçevir, Qəbələ, Samux, Şirvan, Sumqayıt, Şəki, Yevlaxdan olan 120-dək müəllim iştirak edirdi.

Konfransın açılış mərasimində çıxış edənlər bu cür konfransların müəllimlərin peşəkar inkişafında rolunu vurğulayıb.

Sonra qonaq qismində dəvət olunan Jeimy Maldonado xarici dilin erkən yaşlarda öyrənilməsi və AzETA Bərdə filialının rəhbəri Tofiqə Məmmədova uğurlu layihələrin yazılışı mövzusunda plenar məruzə ilə çıxış edib. Plenar məruzədən sonra konfrans öz işini sessiyalarda davam etdirib.

Konfransın sonunda ailəsi ilə Gəncədə yaşayan və işləyən kolumbiyalı Diyeqo gitarada öz milli mahnılarını ifa edib.