Gəncənin Bala Bağban adlanan məhəlləsində yerləşən, 1980-ci ildə "Nizami" bədii filminin çəkilişləri üçün inşa edilmiş, əhali arasında "Nizaminin evi" kimi tanınan tikili baxımsızlıqdan uçub-dağılır.

"Nizami" bədii filminin kadrları bu evdə lentə alınıb. Tikili 1984-cü ildə Nizami Gəncəvinin ev-muzeyi statusu alsa da, sonradan baxımsızlıqdan yararsız hala düşüb.

Fotolar: F.Ziyadova

Məsələ ilə bağlı Gəncə şəhər İcra Hakimiyyətindən GancaPost.info-ya verilən məlumata görə, sözügedən ev muzeyi tarixi abidə kimi qeydiyyatda deyil.

"Nizami Gəncəvinin 840 illiyi münasibətilə 1980-ci ildə 2 seriyalı “Nizami” bədii filminin çəkilişi üçün şəhərin İsmət Qayıbov küçəsi, III döngə, 10 ünvanda ev-maket tikilmişdir. 1984-cü ildən etibarən Gəncə şəhər Mədəniyyət İdarəsinin nəzdində həmin ev-maketdə Nizami Gəncəvi Xatirə Ev Muzeyi fəaliyyətə başlamışdır. 2004-cü ilin yanvar ayının 1-dən 2014-cü ilə kimi şəhərin Təbriz küçəsində yerləşən “Qızıl Hacılı” Tarix-Memarlıq abidəsində fəaliyyətini davam etdirmişdir. 2013-cü ildə “Heydər Əliyev Fondu”nun dəstəyi ilə Nizami Gəncəvi Məqbərəsinin ərazisində müasir üslubda 4 mərtəbəli bina inşa edilmişdir. Binada 493 m2 ekspozisiya zalı 12 otaq 100 nəfərlik konfrans zalı və 1 kafe vardır. 2014-cü ilin yanvar ayının 21-dən Azərbaycan Respublikasının Prezidenti cənab İlham Əliyev Gəncə şəhərinə növbəti səfəri zamanı muzeyin açılış mərasimində iştirak etmişdir. “Nizami” bədii filminin çəkilişi üçün inşa edilən ev-maket tarixi abidə kimi qeydiyyatda deyil və yaxın gələcəkdə təmir-bərpası nəzərdə tutulmur"- məlumatda qeyd edilib.