Gəncədə tarixi qəbirlərin, türbələrin mühafizəyə ehtiyacı var.

Gəncənin "Səbiskar” qəbristanlığında yerləşən qədim türbələr baxımsızlıqdan dağılır. Təəssüflər olsun ki, burada köhnə qəbirlər baxımsızlıqdan, təbii amillər və izləri çox aydın görünən insan müdaxiləsi üzündən dağılır.

XVII əsrə aid olan bu qəbiristanlıqdakı türbə və qəbirlər hələ tam araşdırılmadığından, tarixçilər onun qorunmasını vacib sayır. Buradakı məzarlar etnoqrafik xüsusiyyətlər baxımından, həmçinin epitafiya elmi, yəni qəbir daşlarının üzərindəki nəqqaşlıq, daşyonma və bu kimi digər məzarüstü nümunələrilə də qiymətlidir. Buradakı 20-ə yaxın qədim türbə və sərdabə var ki, onlar da Gəncə şəhər memarlığının ayrılmaz hissəsi hesab edilir.

Qeyd edək ki, bu məzarlıqda Gəncənin yetişdirdiyi böyük şəxsiyyətləri dəfn olunub.

Məsələ ilə bağlı Gəncə şəhər İcra Hakimiyyətindən GancaPost.info-ya verilən məlumata görə, Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin əməkdaşları, Gəncə Şəhər İcra Hakimiyyətinin aidiyyəti şöbəsinin nümayəndələri və "Səbiskar" qəbirstanlığının rəhbərliyi ilə birlikdə qeyd olunan ərazidə monitorinq keçirmişdir. Gəncənin qədim "Səbzikar" qəbirstanlığı ərazisində olan və tarixi abidə kimi dövlət qeydiyyatına alınan türbələrdən bəzilərinin təbii hadisələr səbəbi ilə aşınmaya məruz qaldığı aşkar edilmişdir. Sözügedən türbələrin bərpası burada dəfn olunan şəxslərin ailə üzvləri və ya yaxınlarının müraciətləri əsasında "Tarix və mədəniyyət abidələrinin qorunması haqqında" Azərbaycan Respublikasının Qanununa uyğun olaraq həyata keçirilə bilər.