"Avropa İttifaqı “Yerüstü minalarsız Cənubi Qafqaz” 2022-ci il Regional kampaniyasını dəstəkləyir".

Avropa İttifaqı 2019 və 2021-ci illərdə də həmin kampaniyaya dəstək verib.

GancaPost.info saytı "Turan"a istinadən xəbər verir ki, bu barədə Qafqaz Siyasi Araşdırmalar Mərkəzi, LinksEurope təşkilatı və Avropa İttifaqının Azərbaycandakı nümayəndəliyinin Bakıda keçirdiyi tədbirində məlumat verilib.

Avropa İttifaqının Azərbaycandakı nümayəndəliyinin rəhbəri Peter Mixalko bildirib ki, Avropa İttifaqı ANAMA-ya 6 milyon avrodan çox yardım edib. O hesab edir ki, işğaldan azad edilmiş rayonların öz evlərinə qayıdan sakinlərinə maddi dəstək göstərilməlidir. Bu işdə minalara qarşı maarifləndirmə, iş yerlərinin yaradılması, geri qayıdan köçkünlərin sağlamlığının qorunması ilə məşğul olan ictimai təşkilatlara mühüm yer verilməlidir.

"Avropa İttifaqı Qarabağda tikinti-bərpa işləri üçün Azərbaycana 2 milyard avro ayırıb", - Mixalko deyib.

O, həmçinin region ölkələrinin minaların qadağan edilməsi haqqında müqaviləyə (Ottava Konvensiyası) əməl etməsinin vacibliyindən danışıb. Lakin problem ondan ibarətdir ki, region ölkələri bu konvensiyaya qoşulmayıb.

Tədbirdə ermənilərin basdırdıqları minaların partlaması nəticəsində xəsarət alan mülki şəxslər iştirak ediblər. Onlar mina partlayışlarının nəticələrinin yaratdığı çətinliklərdən danışıblar, dünya birliyini minalardan istifadənin qarşısını almaq üçün səyləri artırmağa çağırıblar.

“Yerüstü minalarsız Cənubi Qafqaz” kampaniyası beynəlxalq tərəfdaşlarla birgə çalışan Ermənistan, Azərbaycan və Gürcüstandakı təşkilatların iştirakı ilə regional tədbirdir. Kampaniya LINKS Europe tərəfindən koordinasiya edilir əlaqələndirilir və Avropa İttifaqı tərəfindən dəstəklənir.