Gəncənin orta məktəblərində dərs deyən 2 müəllim koronavirusdan dünyasını dəyişib, 4 məktəbdə 4 sinif tədrisi distant formada aparılır. Eləcə də müəllimlərin 3-cü doza vaksinasiyası və məktəblərin dezinfeksiyası aparılır.

GancaPost.info saytı KepezTV-yə istinadən xəbər verir ki, Gəncədə 47 minə yaxın məktəblinin 72-sində koronavirus aşkarlandığından dərslərdə iştirak etmirlər. Xəstəliyin yayıldığına görə, 14, 18, 24 və 29 nömrəli məktəbin hər birində 1 sinif olmaqla ibtidai siniflər distant təhsilə keçib. Müəllim və texniki heyətdən isə 74 nəfərin COVİD 19 testinin cavabı müsbət çıxıb. Bu ay şəhərin 20 nömrəli orta məktəbin 63 yaşlı ingilis dili müəllimi Lətifə Cavadova və 29 nömrəli məktəbin 55 yaşlı musiqi müəllimi Sevinc İbrahimova COVİD 19-dan vəfat ediblər.

Oktyabırın 26-dan isə Gəncənin məktəblərinin müəllimlərinin üçüncü doza vaksinasiyasına başlanılıb. Bunun üçün təhsil ocaqlarında xüsusi məntəqələr yaradılıb. Son məlumata görə, 613 müəllim vaksinin 3-cü doza vaksin olunub.

Bununla paralel təyin olunan qrafiklə şəhərin orta məktəblərində dezinfeksiya işləri də aparılır. Dezinfeksiya işləri günün ikinci yarısı eləcə də həftə sonlarında aparılır.